TravelNews.Az Turizm Xəbərləri
Related Articles
Turizm biznesi peşəkarları üçün “B2B Luxury & MICE Workshop” adlı ənənəvi illik tədbir keçirilib.
TravelNews.Az AZƏRTAC-a istinadən xəbər verir ki, tədbirin təşkilatçıları Britaniyanın TMI Consultancy konsaltinq şirkəti və onun Azərbaycandan olan tərəfdaşlarıdır. “Workshop”un iştirakçıları bir tərəfdən Azərbaycan turizminin lüks seqmentindən olan aparıcı şirkətlər, digər tərəfdən isə dünyanın müxtəlif ölkələri və regionlarından olan xarici beşulduzlu otellər, turoperatorlar və turizm ofislərinin nümayəndələridir. “B2B Luxury & MICE Workshop” layihəsi çərçivəsində fevralın 13-də Almatıda “workshop”lar keçirilib, 17-də isə Tbilisidə keçiriləcək.
Bu il ilk dəfə olaraq tədbirin rəsmi tərəfdaş ölkəsi qismində Sloveniya çıxış edib. “Workshop”un açılışında bu ölkənin turizm ofisinin nümayəndələri Bakının turizm şirkətləri üçün təqdimat keçirib, turizm istiqaməti olaraq ölkənin unikal cəhətləri haqda söhbət açıb, habelə “Turkish Airlines” hava yolları şirkəti Sloveniyanın paytaxtına Bakı-İstanbul-Lyublyana təyyarə reyslərinin əlverişli proqramını təqdim edib.
