AZAL Azərbaycan Turizm Assosiasiyasının İdarə Heyətinin üzvü olub və bununla da Azərbaycanda ilk dəfə olaraq özəl və dövlət sektoru turizm sektorunun inkişafı üçün tərəfdaşlıq qurub.
TravelNews.Az xəbər verir ki, tədbiri giriş sözü ilə açan Mədəniyyət və Turizm Naziri Əbülfəs Qarayev bu sazişin Azərbaycan turizmi üçün önəmindən danışıb. Sazişi “Azərbaycan Hava Yolları” QSC-nin vitse-prezidenti, AZAL sərnişindaşıma şirkətinin icraçı direktoru Eldar Hacıyev və AZTA-nın sədri Nahid Bağırov imzalayıb. Qeyd edək ki, Assosiasiyanın tərkibinə aviaşirkətin daxil olması ilk dəfədir. İndiyə qədər Azərbaycan Turizm Assosiasiyasının üzvləri sırasına turizm şirkətləri və otellər daxil olub.
AZAL Assosiasiyaya üzv olmaqla yanaşı AZTA-nın idarə heyətinə tərkibinə də daxil olub və gələcəkdə aviasiya nəqliyyatının fəaliyyətininin əlaqələndirilməsində iştirak edəcək.
AZAL-ın Azərbaycan Turizm Assosiasiyasında fəaliyyəti ölkədə turizm sənayesinin əsas iştirakçıları – turizm şirkətləri, otellər və aviasiya sahəsinin fəaliyyətinin üçtərəfli əlaqələndirilməsinin formalaşdırılması deməkdir. Turizm şirkətləri, otellər və aviasiya sahəsinin iştirakı olmadan lazımi keyfiyyəti təmin etmək mümkün deyil.
AZAL aviaşirkətinin Azərbaycan Turizm Assosiasiyasının idarə heyətinin tərkibinə daxil olması və Assosiasiyanın üzvü olması dövlət başçısı tərəfindən turizm sektorunun inkişafının təmin edilməsi və beynəlxalq standartlara uyğunlaşdırılması üçün turizm sektorunun iştirakçıları qarşısında qoyduğu məqsədlərdən birinə nail olmaq deməkdir.
Bundan sonra, turizm sənayesinin üç əsas aparıcı qüvvəsi əlaqələndirilmiş fəaliyyət göstərəcək. Bu fəaliyyət Azərbaycana turist axınını təmin etməklə yanaşı, turizmin bütün istiqamətlərinin inkişafına imkan verəcək ki, bu da əhalinin məşğulluğunun təmin olunması üçün əlavə təkan olacaq.
Qeyd edək ki, bugünki tədbirdə turizm agentliklərinin, otellərin eyni zamanda Naxçıvan “Duzdağ” otelinin və müxtəlif KİV-lərin nümayəndələri iştirak edib.
Şərhlər
şərhlər
TravelNews.Az Turizm Xəbərləri
