Azərbaycanın turizm potensialı Polşada təbliğ olunur

Azərbaycan Turizm Bürosunun təşkilatçılığı ilə ölkəni təmsil edən turizm sənayesinin üzvləri Varşavada keçirilən “TT Warsaw 2019”  sərgisində iştirak edir.

Sərgidə iştirak etməkdə məqsəd Azərbaycanın turizm imkanlarının Mərkəzi Avropa bazarlarında təbliği və ölkəyə daha çox turistin cəlb olunmasına dəstək göstərməkdir.

Beynəlxalq sərgidə dörd turizm şirkəti və bir hotellər qrupu ilə təmsil olunan Azərbaycan stendi ilk gündən etibarən çoxsaylı ziyarətçilərin marağına səbəb olub və onlara Azərbaycanın turizm potensialı barədə ətraflı məlumatlar verilib.

Azərbaycan stendini ölkəmizin Polşadakı səfiri Həsən Həsənov da ziyarət edib və nümayiş olunan təbliğat materialları ilə tanış olub.

Noyabrın 23-dək davam edəcək sərgi çərçivəsində maraqlı tərəflərlə işgüzar görüşlər keçirilir və gələcək əməkdaşlıq üçün fikir mübadiləsi aparılır.

Mənbə: Azərbaycan Respublikasının Dövlət Turizm Agentliyi